Poltsatik mandarinak ihes egin dit eta bagoi OSOA gurutzatu behar izan dut bere atzetik, bidaiarien gozamenerako #trenean
— Idoia Torregarai (@bootxo) May 30, 2019
Idoia Torregarairen txio honetatik abiatu zen dena. Irribarrea sortu zitzaidan gertatutakoa irakurri bezain laster eta oroitzapenak berritu zizkidan.
Behin tipula batek poltsatik ihes egin zion emakume bati autobusean, itzulipurdika beste aldera joan eta bueltan itzuli zen. Inspiratu egin ninduen eta narraziotxo bat idatzi nuen eszena hura abiapuntutzat hartuta.
— Maitane Legarreta Etxezarreta (@mailegetx) May 30, 2019
Idatzi nuen narrazio laburra nonbait irakur ote zitekeen galdetu zidan Idoiak eta sarean irakurgai ez zegoenez, testua topatu eta lotsa handiegirik ematen ez bazidan, blogean zintzilikatuko nuela erantzun nion. Disko gogor eramangarrian begira aritu nintzen baina ez nuen aurkitu. Duela egun batzuk e-maila txukuntzen hasi eta bertan topo egin nuen dokumentuarekin. 2015ean idatzitako testu bat da, ziur asko orain beste modu batera idatziko nukeena. Berridazteko tentazioa ere izan dut baina bere horretan uztea erabaki dut azkenean, falta zen l-ren bat edo beste eransteaz aparte. Ea zer iruditzen zaizuen!